Aaj tumhare sehar gaya tha

 Aaj tumhare sehar gaya tha

Unhi galiyon se guzra

Waisa hi bazaar tha

Kuch nahi badla hai.....Tumhare siwa

Har kisi ko dekh raha tha

Koi to pehchhan le

Ki kabhi mein bhi isi sehar mein tha

Baar baar dekh raha tha

Bade gaur se

Koi to mere mohabbat ka gawah hoga

Koi to tera haal pucchega

Par kon yaad rakhta hai

Jaha har din koi n koi dil bezaar hota hai

Har dukan ki taraf mura

Saayad kisi ka udhar baaki ho

Us sabzi bazaar se bhi guzra

Koi to pucche

Mem sahab kaha hai

Socha aaj saare aloo pyaz kharid lu

Har saam tumhe chhor bazar aana parta tha n

Fir wo patli gali pakar ke

Us makan ke pass se bhi guzra

Jiske munder par baith hum dono

 har saam guzara karte the

Haathon mein haath liye

Taare gina karte the

Tut-te tara se ek dusre ko maanga karte the

Ek dusre ka saath nibhane ka wada karte the

Lakh julmo sitam dhaye jaayenge

Ek dusre ke bina kabhi nahi reh paayenge

Makaan ke andar dekha

Chehre to pechhane hue the

Socha andar jakar ek baar us kamre ko bhi dekh aau

Par kadam thithak gaye

Andar koi apnapan nahi tha

Aankhen to wahi thi

Nazrein purani ho gai thi

Socha yaad dila du

Kabr se laash nikal lu

Apni mohabbat ke janaje ko ek baar fir kandha de du

Dil mein ajib si hook thi

Ek baar fir maana

Dard hone pe asoon nahi aate hai

Mein mara nahi

Mar raha tha

Yeh jindagi hote hue bhi

Mein is duniya mein nahi tha

Bemurabat hai yeh sahar

Sehar mein bhir to hai

Fir bhi mein akela hu

Ek tumhara haath jo mere haath mein nahi hai

Mere liye yeh Sehar badnaseeb hai

Gumnaami hai charo taraf

Kyunki ek bas tu nahi hai

Bahut roka tha tumhe

Bahut samjhaya tha tumhe

Ek hi jindagi hai

Ek hi ishq hai hamara

Mukammal kar lete hai

Jamane ke aage n jhukte hai

Ek apni duniya basa lete hai

Duniya to waisi hi hai

Bas humari duniya dikh nahi rahi...