Bahut dino baad ghar aaya hu

 Ghar aaya hu

Bahut dino baad ghar aaya hu

Fir laut ke ghar aaya hu

Unke pass aaya hu

Jinka mein hu

Unke hi pass aaya hu

Jinse mein hu

Mein ghar aaya hu

Bahut dino baad aaya hu

Apno ke pass aaya hu

Apno se milne aaya hu

Bhuli bisari baaton ko yaad karne aaya hu

Darakhto ko silne aaya hu

Ghar ki marammat karne aaya hu

Ghar ki deewaro ko safed karne aaya hu

Duri bahut badh gayi thi 

Use kam karne aaya hu

Bahut dino baad ghar aaya hu

Khidkiyon ko khol ke dekha

Lagta hai apne sehar aaya hu

Bahut dino baad ghar aaya hu

Yaha kamre nahi

Mohabbat ke sandook hai

Ghar nahi

Yaha to bas mohabbat hi mohabbat hai

Kya upar kya neeche

Saalon baad aaya hu

Bahut dino baad ghar aaya hu

Waqt to bahut beet gaya hai

Apno ke chehre bata rahe hai

Dil ko afsos bhi hai

Andar se kuch accha nahi lag raha hai

Ghar ka kona kona pucch raha hai

Ki itne din baad kyu aaye

Kya sachmuch hi apno ki yaad n aayi

Apne jaro se hi itna farik kyu

Kitna kamjarf insaan hu mein

Kisse thi raqaabat mujhe

Yaha to sab apne hi the

Fir bhi itne dino baad ghar aaya kyu

Maa ki pathrai aakhein pucch rahi hai

Meri ek baar bhi yaad n aayi

Mein jaahil aur besharm

Sar latkaye khara hu

Bahut dino baad jo ghar aaya hu

Pita ke aakhon mein to kuch bhi nahi

Saayad ab mujhse kuch ummid hi nahi 

Kaatil hi kah lo mujhe

Apno ke jajbaato ka gala ghot diya

Bada hi khudgarz insan hu mein 

Mere se koi mohabbat kyu rakhe

Mein to kambakht aehsaan faramosh nikla

Bahut dino baad ghar aaya hu

Maa ke pass aaya hu

Maa pucch rahi hai kya khaoge

Aaj bhi uske aakhon mein wahi pyaar hai

Sab kuch khila du bete ko

Bas itne ke liye hi betaab hai

Baar baar mujhe niharti hai aur pucchti hai

Itna kamjor kyu dikh rahe ho

Bahu dhyan nahi deti hai kya

Aaiyegi is baar to daat lagaungi

Pata nahi baccho ko kaise rakhti hogi

Unhe kya pata ki

Wo n aayegi kabhi aur mere bhi aane pe kitni bandish lagayegi

Aankhon mein aasu bhar gaye hai

Kuch bol nahi paa raha hu

Aloo paratha banao n maa

Ab nadiya kaha rukne wali thi

Sailab aa gaya

Bahut dino baad aaj ghar aaya hu

Kitna patthar dil insaan hu mein

Maa ki bhi yaad n aayi

Aisa koi paapi bhi n hoga

Jisne maa se aisi bewafai ki hogi

Bahut dino baad ghar aaya hu

Pita ke pass aaya hu

Suna tha beta 

baap ka kandha hota hai

Budhaape mein dost hota hai

Kuch kah nahi paa rahe the

Mujh pe ab bharosa n tha

Bahut dino baad jo ghar aaya tha

Kitni baatein unke jehan mein hongi

Saalon se jama hongi

Parat dar parat

Soche honge 

Jab beta aayega

Chai ke saath guftgu hogi

Par aaj jaban band hai unki

Oth hil bhi nahi rahein hai

Saalon ke aasun

 gale mein utar gaye hai

Ajib si chuppi hai

Mere unke darmiyaan

Bahut dino baad ghar aaya hu

N woh kuch bol paa rahe hai

N mein najar mila paa raha hu

Mujhe ab bhi unki chai yaad hai

Pura duniya ghuma

Patna mein bhi saalo raha

Par subah ki unki chai

Bas unke apno ko hi naseeb hui

Suraj ki pahli kiran mein ghuli woh chai

Aur haath mein akhbaar

Aaj bhi mere jehan mein hai barkarar

Fir bhi itne din baad ghar aaya hu

Bahut dino baad ghar aaya hu