Dambh ka darpan

 Tumhe kyu lagta hai aanewala itihaas tumhein pujega

Sach to yeh hai ki aanewala waqt tum pe thukega

Tum kis sapne

mein ji rahe ho

Neend mein hi raho

Apna ant sunischit karo

Tum to bas satah pe ho

Hriday se kosho dur

Tum to bas chhaya ho

Nahi hai koi stathiyetwa

Puja hoti hai charitra ki hi

Charitra hi banata hai mahan

Kitna bhi maaya saj lo

Khud ko dhak lo

Nahi tik paaoge satya ke samaksh

Sach ka bilkul gyaan nahi hai tumko

Arthhin baaton mein uljhe ho

Yeh bas tumhara sach hai

Vastvikta se bahut dur hai

Abhi ghana kohra hai

Log somras mein dube hai

Jhooth ko hi sach maan baithe hai

Jhooth ki hi maya hai

Sayad kalyug ka pratap hai

Laalach ka vatavaran hai

Sab uske hi prabhaw mein hai

Dikha ke dar

 Nafrat faila rahe ho

Ghrina ke rath par sawar hokar

Vijayshri ko paa rahe ho

Par jo bhi hai kshanbhangur hai

Chhatne do is kohra ko

Sach fir saamne hoga

Ho jaaoge bhaybhit

Dekh ke sach ka bhishan swaroop

Ki yahi tumhara pratibimb hai

Aata hai aisa samay

Kaal ki anwarat yatra mein

Satya aawran odhe rahta hai

Nahi hota drishtigochar

Maanav apne abhimaan mein

Nahi maanta hai satya ko

Par rahta hai satya vidyamaan

Tum bhi dhokhe mein ji rahe ho

Mithya se vismit ho

Jhoothi prashansa ke murid ho

Par swikaar nahi kar rahe ho apne galti ko

Kyunki abhimaan se bhare ho

Kiye jaa rahe ho bhul pe bhul

Par tumhein iska tanik bhi bhaan nahi hai

Aayega atal sach nischint raho

Tum saamna kar paaoge

Ispe shanka hai

Saayad yeh tumhara samay hai

Chhute ho mitti ko 

Ban jaata swarn hai

Par yeh bas kshanik parinaam hai

Hona kuch aur hai

Aur ho raha kuch aur hai

Maaya ka hi ek roop hai

Andhkaar kitna bhi gehra ho

Ek kiran ke saamne prabhawhin hai

Parivartan aayega 

Awashyambhawi hai

Andhera jaayega

Tumko satya ka bhaan hoga

Mein bhi pratiksha mein hu

Tum bhi pratiksha karo

Ahankaar ki bhasa bol rahe ho

Kuch se kuch bhi bol rahe ho

Anargal alaap mein vyast ho

Abhimaan se paripurn ho

Ativiswaas mein satya ko prabhawit karne ka prayatn kar rahe ho

Yaad rahein

Satya pareshan ho sakta hai

Parajit nahi

Lagta hai ant paas hi hai

Subah hone hi wali hai

Andhera mitne wala hai

Tumhare dambh ka darpan tutne wala hai....