Mandir jaa raha tha mein

 Aaj bhi raaste mein wo dikhi

Mandir jaa raha tha mein

Thora bhi sharm bich mein n aane di

Aankhon ko aakhon mein utarne di

Mera Prem swikarya hai use

Bas uska hi praman hai yeh

Fir bich mein lajja ko kyu aane deti

Jab dono ke hriday ko yeh swikarya hai

Netra to bas madhyam hai

Anubhuti ke to aur bhi saadhan hai

Par aakhon se bhawnaon ka aadan pradan ishwar paane ke saman hai

Nischal aur nirmal hai

Nishkapat aur nirdosh hai

Har saam mein mandir jaata

Par kyu jaata tha mandir

Maa to har jagah hai

Maa to sab mein hai

Fir mandir mein aisa kya alag tha

Jo mujhe apni aur khichta tha 

It pathar ki hai sanrachna

Baaki bhawno jaisa hi hai

Maa to mere saath thi

Is bhawan mein aisi kya baat thi

Mehnat ka fal mitha hota hai

Usmein juda santosh hota hai

Roj jaata tha maa ke pass

Lagta tha unse hi milne aaya hu

Sab saath chhor gaye the

Kuch n tha mere pass

Bhari sunya tha man mein

Akelapan bhar n paata tha

Maa ka ahsaas hi antim ilaaz tha

Is nirjan sansar mein maa se hi apnapan tha

Dekh asafalta apna saaya bhi saath chhor jaata hai

Phir rishto ki kya baat karein

Ugta ko hi sab pucchte hai

Dubta to kho jaata hai

Ek baar jo man se viswaas gaya

Sara raasta apne aap hi band ho jaata hai

Man durwikaro se bhar jaata hai

Dur tak andhera chha jata hai

Aisa anishit samay tha mera

Kismat se yudh mein rat tha

N koi raasta dekh

Maa ke sharan mein gaya

Maa ka hi bharosa tha

Isliye maa se milne jaata tha

Mandir mein to log aate hi hai

Ishwar se manchaha fal chahte hi hai

Par waha har saam bhir nahi hoti thi

Bas ravivar ki saam ko hi abadi thora jyada hoti thi

Maa se milne aate the

Ya saam bitane aate the

Jiwan ka yeh katu satya

Hum sab ko gyaat hai

Mandir to purana hai

Par log naye hai

Ek budhi dadi bhi aati thi

Par woh Maa ki puja hetu aati thi

Sandhya aarati ki hissa thi woh

Saalon se aa rahi thi

Unki bhakti unke chehre pe jhalakti thi

Unhone pura jiwan maa ko arpan kiya tha

Maa se prem hi to hai

Na mujhe kapkapati thand rok paati thi

Na musladhaar baarish

Dadi ki kya baat kahu

Woh to pura jiwan hi yeh aadarsh sthapit ki thi

Ek larki bhi unke saath aati thi

Wo mujhe pehchanti thi

Mein bhi uska intezaar karta tha

Bina kuch kahe hi hum ek dusre ki bhasa samajhte the

Ek dusre ke aakhon mein utarte the

Hamara hriday ek tha

Pavitra aur nischal

Baccho ka yeh prem kitna utkrist tha

Par kuch din baad wo aana band kar di

Ek aaghat sa tha

Hriday ko tikshna peeda hui thi

Par maa ko mujhpe daya aa gayi

Dadi ko sahara dene ek nayi larki aane lagi

Saayad wo uski hi behan thi 

Mujhe to roj hi jaana tha

Kaise bhulo un adarsh saamo ko

Bhakti aur prem se autprot

Pura din sandhya ke intezaar mein vyagra rahta tha

Maa se jo milna tha

Daudte bhaagte roj pahuchta tha

Maa se milne ki ajeeb chatpataht thi

Kabhi pasine mein simta hua

To kabhi bhinga hua pahuchta tha

To kabhi kapkapati saam mein

To kabhi machalte hue sandhya mein

Vasant ke saam ki baat hi alag thi

Jaake waha baithta tha ghanto tak

Hare ghaas ki makhmali chadar par

Kabhi ghaas sukha bhi rahta tha

To kabhi baarish ke pani se laba lab

To kabhi os mein bheenga hua

Mujhe to maa se milna tha

Ghaas se bhi anokha sambandh tha mera Ghaas bhi pecchane lagte the

Unhe bhi mujhse prem hogaya hoga

Tabhi to mujhe dekh ithlaate the

Kabhi Idhar mur jaate the

To kabhi udhar muh kar lete the

Mein bhi unpe baith ghanto tak maa se baatein karta tha

Dil ka har dard unse saajha karta tha

Par maa ko nahi dekh paata tha

Pata nahi kyu

Saayad sharmata tha

Maa samajhti thi

Unka yeh beta thora sa pyara hai

Saal beet gaye

Har saam ki intezaar mein

Wo ehsaas fir nahi mila

Uski kami dil mein kahi dabi hai par khaas hai

Use bhi roj hi aana tha

Surmayi saam ko niharna tha

Aarati to bahana tha

Sach mein to maa se milna tha

Mein uske liye kya tha

Yeh to maa ko hi pata tha

Naam bhi nahi jaan paaya tha saalon mein

Par dono bandhe the ek hi prem ke dor se

Ek hi hriday tha

Jo prem se juda tha

Maa hi saakshi thi hamare prem ki

Mandir mein maa ke yeh do bacche 

Jo bhakt bhi the unke

aakhon se milte the 

Har saam aakhon se hi dil ki baatein saajha karte the

Ek ankaha sa sambandh tha hamara

Bilkul pavitra aur nischal

Duniya ke paridhi se bahut dur

Antarman mein kahi nihit

Mandir hi woh sthan tha

Jo hamare liye kshitiz ke paar tha

Dubte suraj ke saath

Mandir hi hamare prem ke liye nir tha

Wo bhi ghanto rahti mandir ke prangan mein

Aur mein ghaas pe baitha

Wo maa ke paas hoti

Mein thora dur jameen pe baitha

Use to puja bhi karna tha

Mein to sadharan tha

Mein agrbatti,dhup se thora dur tha

Mein bas waha baitha rahta

Mere liye woh ghar jaisa tha

Maano mein to wahi rahta tha

Sabka prem mujhe sulabh tha

Par jab woh aane lagi

To mera prem bhi uske liye hi tha

Mein bhi roj jaata

Na mein kabhi ruka

Aisa bhi nahi hua

Ki wo kisi bhi din n aayi ho

Saalon tak aisa chalta raha

Maa ki Sandhya aarati ke hum dono saakhshi banein

Ab tak maa ka hi bharosa tha

Ab usse bhi kuch lagaw sa tha

Mandir mein to kai log aate the

Ek ankaha sa pehchaan ho gayi thi

Par us ki baat alag thi

Kaisa hai yeh sambandh

Ek bhi shabd kharch nahi

N kuch kahne ki jarurat

N kuch sunne ki jarurat

Bas har sandhya maa ke pass hum dono

Maano mein pagal hota to baat alag hoti

Par uska viswaas to mujhse bhi jyada atal tha

Maa ke saath mujh mein bhi tha

Prem vyavahar hai

Yeh koi karm nahi

N hi koi pratikriya hai

Khone paane se upar 

Ishwar ko mahsoos karna hai

Yeh nirgun khsan

Mere jiwan ki sabse badi uplabdhi hai

Jiwan kitna sundar hai

Iska hi udharan hai

Prem se badhakar is sansar mein kuch nahi

Tu prem ho jaa

Ishwar se alag nahi hai

Lagta hai jiwan mein sab kuch paa liya

Ab kuch paana sesh nahi

Jisne aisa utkrist prem paa liya

Koi use kya de paayega

Aur jiwan mein isse badhkar kya hi paayega

Saari shristi sunya hai

Saara samay gaun hai

Us antim bindu pe mera man hai

Kon si ritu kab aayi

Kon si ritu kab beet gayi

Kab maa aayi aur chali gayi

Kab holi rang barsa gayi

Kuch nahi pata mujhe

Bas maa ke pass jaana hai

Itna hi yaad raha

Yaha koi prem geet nahi

Jiska srijan mere hriday mein hua ho

Uske aalokan se

Mere man mein koi sangeet bhi utpan nahi

N hi koi mridang baja ho mere man mein

Na hi mera hriday jhankrit hua ho uske sparsh se

Na koi naya raag gaya meine

N suro ki lahariya saji mere man mein

Sab kuch sunya hai

Bhawrahit hai

Kuch bhi paane ki lalsa nahi

Bas maa ke pass jaana hai

Itna hi dhridta thi mere man mein

Sansar mein itna uttam prem kisne paaya hoga

Bhawvihin aur sunya

N koi rup ka saundarya

Jiska bakhan mein karu

N koi kaam ki uttejna

Jiski laalsa mein purn karu

Aisa kuch bhi nahi

Maa se prem ke saman hi

Itna nischal itna nirwikaar hi

Kuch nahi hai mere man mein

Us prem ka pradarshan ke liye

Bas wo hai kahi

Mere man mein itna hi spandan hai

Aaj itne saal bit gaya hai

Prem aaj bhi usi saman hai

Mein bhi ab waha nahi

Jab ghar jaata bhi hu to

Mandir kaha jaa pata hu

Par kai saal beet jaane ke baad bhi

Ek dusre ke liye wahi aakarshan hai

Uske aakhon mein waisa hi prem hai

Lajja ko bich mein nahi aane deti hai

Kaisa yeh uttam prem hai

Mein n bhi maanu

Ho jaau apne soch mein idhar udhar

Mera viswaas dig bhi jaaye

Par uska vyavahar nahi badalta

Aankhon mein aakh utarta hi hai

N kuch kahna parta hai

N kuch sunne ki jarurat parti hai

N koi sparsh ki iccha

N paa lene ki koi jidd

Phir sawal man mein uthta hai

Aakhir mein hu kon

Garv se man bhar jaata hai

Par mein to kuch bhi nahi

Maa mahan hai

Maa hi sab kuch

Jiwan ke yatra ka sabse sukhad paraw hai

Us samay nischit hi mein akela tha

Dukh saajha karne ko koi n tha

Mere har karya mein viswaas ki kami parilakshit hoti thi

Safalta ka koi naamo nishan hi n tha

Bhavishya bhi andhkaar mein tha

Par prem ke aise anand mein hriday prafullit tha

Man tript tha

Jiwan harshit tha

Ek alag tarah ka hi anand tha

Jiwan bhakti ras se purn tha

Maa ke sanidhya mein tha

Maa ke kitna pass tha

Aaj sab kuch badal gaya hai

Sab kuch mere pass hai

Dukh baatne ko kai saathi pass hai

Par maa ke pass nahi jaa pata hu

Us utkrist prem se vanchit rah jaata hu....