Mein apni soch ka ghulam hu

 Mein jo sochta hu

Wahi likhta hu

Mein jo dekhta hu

Wahi sochta hu

Jo mein dekhna chahta hu

Wahi mein dekhta hu

Kaise kahu ki mein azaad hu

Jabki mein apni soch ka ghulam hu

Mere andar jo bhi hai

Use hi to bahar karta hu

Mere andar kya hai

Bas mere yaatra ka vritaant hai

Mera raasta alag hai

To mera anubhav bhi alag hai

Mera drishtikon alag hai

Meri soch alag hai

Mere maarg ki meri kathinai

Mera gyaan meri kathinai

Dusre ka gyaan uski kathinai

Mujhe mere raaste ne kuch alag sikhaya hai

Uske raaste ne use kuch aur

Kon yaha sahi hai

Kon yaha galat

Karega kon nirnay

Mein apni duniya ka bhagwan

Woh apni duniya ka sambhu

Meri duniya ke alag niyam

Uske duniya ke alag niyam

Jisne jo dekha hai wahi seekha hai

Jisne jo mahsoos kiya use hi antarman kiya hai

Jisko jo saral laga hai

Usko utna hi prabhawit kiya hai

Mere liye saral kuch aur hai

Uske liye kuch aur saral hai

Sach tak pahunchna kitna muskil hai

Jo sikha hai yahi se sikha hai

Jo samjha hu yahi pe samjha hu

Mera gyaan hai simit

To mera nirnay kaise hoga pavitra

Mein apni vivasta dekh

ghabrata hu

Dekh ke apni majboori

hatash ho jaata hu

Kaisa hai mera gyaan

Jo sachmuch hai agyaan

Mein to sahi ho hi nahi sakta

Kyunki mein to hamesha hi rahunga purvagrah se grasit

Mera gyaan hi dhokha hai

Mujhe ek alag bhavsagar mein dhakela hai

Mera gyaan hi mera sach hai

Uska gyaan uska sach hai

Kaisi yeh vidambna hai

Sach kahu to gyaan ek maya hai

Mein fas gaya hu isi gyaan ke dambh mein

Jo ki bas ek chhalava hai

N hi kisi nirnay pe pahuchata hai

Na hai koi gyaani yaha

Na hai koi yaha jaankar

Sab hai apni hi pothi ke dukaandaar

Apne gyaan ko kahte hai sarvshresta

Nahi karte dusre ke gyaan ko swikaar

Sach to yaha kuch bhi nahi hai

Hamare pahuch se bahut dur hai

Sab kuch mithya hi hai yaha

Bas hamare gyaan ki seema hai

Kitna bhi mukht hona chahu

Ho nahi paata hu 

Kisi n kisi gyaan se jur hi jaata hu

Hai nirnay lena kitna mushkil

Sach tak pahunchna hai bilkul naamumkin

Kisi n kaha ki

Agar sach ki chah hai to

Khud ko khud se alag karo

Khud ko khud se kaise alag karu

Jaise hi alag karta hu

Khalipan aa jaata hai

Phir usmein kuch n kuch bhar hi jaata hai

Yeh hi mera sach

Ki Sach tak pahunch hi nahi paata hu

Kaise jaanu sach is vidhaan ka

Kaise paar pau apne andhkaar se

Agar hai koi duniya rachnewala

Kara de mujhe sach ka gyaan