Mere vichar ko qaid nahi kar sakte

 Tum mujhe qaid kar sakte ho

Mere vicharon ko nahi

Kar lo mujhe kaid

Fir rok sako to rokna

 Mere vicharo ka pravaah

Jitna laaoge sankat mere maarg mein

Utna failega mera vichaar

 Is duniya mein

Yaad rahein

Mere vicharo ka suraj 

utna hi damkega

Jitna rokoge mujhe

Tum mujhe baandh sakte ho

Mere soch ko nahi

Mein azaad hu

Mein azaad hi rahunga

Jo mere vichar hai

Jaahir karunga hi

Mein azaad parinda hu

Kaid nahi kar sakte mujhe

Halat mujhe nahi badal sakte

Itna to yakeen hai khud pe

Mere lab azaad hai

Baat to rakhenge hi

Tumhe pasand aaye ya nahi

Ye alag baat hai

Mere jabaan azaad hai

Mein to bolunga hi

Tum mujhe rok sakte ho

Mere soch ko nahi

Wo to bahar aayenge hi

Kitna bhi rok lo paani ko

Raasta to bana hi leti hai paharon se

Kitna bhi darwaje khidki band kar lo

Kiran to suraakh dhoond hi leti hai

Tum mujhe pe paabandi laga sakte ho

Mere vichar par nahi

Wo to aayenge hi duniya mein

Dilo mein hulchul machayenge hi

Dimaago ko jhakjhorenge hi

Rok sako to rok lo

Mere vicharo ke pravaah ko

Aatma mar nahi sakti

Aur Sharir se mujhe kuch khaas prem nahi

Aatma ki azadi ke liye

Apne praano ki aahuti bhi swikaar hai

Meri aatma azaad hai

Use koi nahi baandh sakta

Mujhe mrityu ka bhay nahi

Tum mujhe nahi

Mere sharir ko hi mita sakte ho

Itna gyaan to hai mujhe

Tum mujhe maar sakte ho

Mere vichaar ko nahi

Gandhi ke shahir ko godse maar sakta hai

Gandhi ke vichaar ko nahi

Suraj ko badal dhak sakta hai

Roshni ko aane se rok nahi sakta

Vichar ho jaate hai aur bhi prasangik

Samay ke aag mein jalke kundan

Andhera kitna bhi gehra ho

Ek lau kaafi hai use mitane ke liye

Mujhe mat darao

Mein darunga bhi nahi

Mujhe mrityu ka bhay mat dikhao

Mein marne ke dar se chup rahunga bhi nahi

Tum mujhe qaid kar sakte ho

Mere vichar ko nahi

Jo mujhe sahi lagega

Wo mein bolunga hi

Jo mujhe galat lagega

Uske khilaaf awaaz uthaunga hi

Azaadi mere dil mein hai

Azaadi mere dimaag mein hai

Azaadi mere ruh mein hai

Mein azaad hu 

To hi jinda hu

Bina azadi ke jindgi kaisi

Ghulami se to maut behtar hai

Mujhe mita bhi doge 

To mere ruh azaad ho jaayenge

Yeh meri soch hai

Ispe hi kayam hu

Tum mujhe baandh sakte ho

Mere soch ko nahi..

Satya pareshan ho sakta hai

Parajit nahi....